जाँगर
मेहनत के फल
लेखक : हेमलाल साहू
एकठन छोटे-से गाँव म फुदालू अउ लतालू नाव के दू झन भाई रहंय। दूनों भाई एके घर म रहंय, फेर दुनों के सोच-विचार अउ काम करे के तरीका म जमीन-असमान के अंतर रहय।
फुदालू ह मेहनती रहय। ओहा दिन-रात अपन काम म लगे रहय। खेत-खार, घर-दुवार अउ खेती-बारी ओखर जिनगी के हिस्सा रहय। ओहा मानय कि मेहनत मनखे के भाग ला बदल सकथे।
दूसरी डहर लतालू ह आलसी रहय। ओकर मन काम म कम अउ घूमे-फिरे, खाय-पिये अउ दूसर के भरोसा म जिनगी बिताय म जादा लगय।
एक दिन बिहनिया के बेरा फुदालू ह अपन छोटे भाई ल समझावत कहिथे—
“देख भाई लतालू! दिन चढ़ जाथे, फेर तोर काम करे के बेरा नइ आ पाय। दिनभर गल्ली-खोर म लुठुर-लुठुर किंजरत रहिथस। अरे भाई, मोर संग खेत म चल। हमन दूनों भाई अपन जाँगर पेरबो, त हमर बंजर खेत घलो हरियर-भरे हो जाही। मेहनत के फल अब्बड़ मीठ होथे।”
लतालू ह ओकर बात ल हँसी म उड़ा दिस।
“तोर मन होथे त तँय दिन-रात खेत म खट। मोला ए सब काम नइ सुहाय। जिनगी चार दिन के हे, खा-पी अउ मजा कर!”
फुदालू ह फेर समझाइस—
“भाई, आज के सुख बर आने के चिंता ल भुला देना समझदारी नइ आय। आज जेन खेत हमर सहारा बन सकथे, ओला मेहनत करके सँवारना चाही। खाली बइठे ले पेट नइ भरय।”
फेर लतालू के ऊपर कोनो असर नइ पड़िस। उल्टा ओहा अपन बड़े भाई ल उल्टा-सीधा सुना दिस।
बात बढ़त गिस। समझाय-बुझाय के बदला दूनों के बीच तकरार होगे। आखिर म झगड़ा एतका बढ़िस कि दूनों भाई अपन-अपन हिस्सा अलग करे के फैसला कर लिन।
उँकर करा कुल दस एकड़ खेत रहय। पाँच एकड़ जमीन उपजाऊ रहय, जिहाँ मेहनत करे ले भरपूर फसल हो सकत रहय। बाकी पाँच एकड़ जमीन बंजर रहय। ओमा खेती करना आसान नइ रहय। जमीन कड़ा अउ पथरीली रहय, पानी के कमी रहय अउ खेती करे बर अब्बड़ मेहनत के जरूरत रहय।
बँटवारा के बेरा लतालू ह चालाकी दिखावत कहिथे—
“ददा! बंजर खेत ल तँय रख ले। मोला नेगी खार के पाँच एकड़ उपजाऊ खेत दे दे। खेती-बारी म तोर मन जादा लगथे, तैं बंजर खेत ल घलो उपजाऊ बना लेबे।”
फुदालू ह छोटे भाई के बात सुनिस। ओहा जानत रहय कि बंजर जमीन ल उपजाऊ बनाय म मेहनत लगही, फेर ओकर भरोसा अपन जाँगर ऊपर रहय।
ओहा मुस्कुरावत कहिथे—
“ठीक हे भाई! तोर मन के होवत हे, तइसने हो जावय। खेत के बँटवारा होवत हे, फेर हमर भाईचारा के बँटवारा झन होवय।”
फेर समय ह अपन चाल चलिस।
फुदालू ह बिहनिया ले साँझ तक खेत म पसीना बहाय। जमीन ल कोड़िस, पत्थर हटाइस, मेड़ बनाइस अउ पानी के इंतजाम करिस। जिहाँ दूसर मनखे मन खाली बंजर जमीन देखत रहिन, उहाँ फुदालू ह हरियाली के सपना देखत रहय।
पहिली बछर मेहनत जादा रहिस, फसल कम होइस। फेर फुदालू ह हिम्मत नइ हारिस। ओहा अपन जाँगर ऊपर भरोसा रखिस अउ लगातार मेहनत करत रहिस।
धीरे-धीरे ओकर मेहनत रंग लाय लगिस। बंजर जमीन म हरियर-हरियर फसल लहलहाय लगिस। खेत के हरियरिमा देखके गाँव के मनखे मन घलो अचरज म पड़ गें।
जेन जमीन ला मनखे मन बेकार समझत रहिन, ओही जमीन अब फुदालू के मेहनत के गवाही देत रहय।
दूसरी डहर लतालू के जिनगी एकदम अलग रद्दा म चलत रहय।
ओहा रोज सोचय—‘आज नइ, काली खेत म जाबे।’ काली सोचय—‘आज घलो रहन दे, परसू ले काम सुरू करबो।’
एमा दिन बीतत गिस, महिना बीतत गिस अउ बछर निकलत गिस। खेत के देखरेख नइ होइस। जमीन म खरपतवार भरागे। मेड़ टूट गे। पानी के सही इंतजाम नइ होइस। धीरे-धीरे उपजाऊ खेत के ताकत खतम होय लगिस।
लतालू ह अपन मेहनत के अभाव म खेत ल उजाड़ डारिस।
एक समय अइसन आइस, जब ओकर घर म खाय बर एक दाना तक नइ रहिगे। जेखर करा उपजाऊ खेत रहिस, ओही ह अब दूसर के दुवारी म अनाज माँगे बर मजबूर होगे।
पेट के आग मनखे ल का-का नइ करावय! लतालू ह गाँव म भीख माँगे लगिस। कोनो दया करके मुट्ठीभर चाउर दे देवय, त कोनो दुवारी ले फटकार के निकाल देवय।
कतको झन ताना मारंय—
“अरे लतालू! तोर करा तो बढ़िया उपजाऊ खेत रहिस। अगर तनिक मेहनत कर लेतस, त आज दूसर के दुवारी म हाथ पसारे के नौबत नइ आवतिस।”
लतालू ह सब सुनय, फेर ओकर करा जवाब देय बर कुछ नइ रहय। ओकर मन म पछतावा के आग जरत रहय।
एक दिन फुदालू ह गाँव के रद्दा ले जात रहय। ओहा देखिस कि ओकर छोटे भाई ह एक घर के दुवारी म खड़े होके भीख माँगत हे। फुदालू के कलेजा ह काँप उठिस।
ओखर आँखि के आगू भाई के संग बिताय बचपन के दिन घूमे लगिन। एके घर म पलना, संग-संग खेलना अउ सुख-दुख बाँटना—सब कुछ ओकर मन म जाग उठिस।
ओहा सोचिस—
‘मोर भाई गलती करिस, त का होइस? आखिर ओ मोर भाई आय। का मँय अपन भाई ल ए हालत म छोड़ सकथँव?’
फुदालू ह तुरते लतालू करा गिस। ओकर हाथ ल पकड़िस अउ मया ले कहिथे—
“चल भाई, घर चल।”
लतालू ह सिर झुकाके कहिथे—
“ददा, मँय तोर संग का मुँह ले जावँव? मँय तोर बात नइ मानेंव। अपन हाथ ले अपन जिनगी बिगाड़ेंव। आज मोला अपन करनी के सजा मिलत हे।”
फुदालू ह ओकर पीठ थपथपावत कहिथे—
“भाई, गलती करना बुरा आय, फेर गलती करके घलो नइ सुधरना ओखर ले जादा बुरा आय। बीते बात ल छोड़ दे। मोर करा जे कुछ हे, वो तोर घलो आय। फेर एक बात गाँठ बाँध ले—अब हमन मेहनत करके खाबो।”
ओहा आगू कहिथे—
“देख भाई! जाँगर पेरबे, त बंजर जमीन घलो सोना उगल सकथे। अउ जेन मनखे मेहनत करना छोड़ देथे, ओकर हाथ म उपजाऊ जमीन रहिके घलो गरीबी आ सकथे। धन-दौलत ले जादा जरूरी हे मेहनत करे के आदत।”
बड़े भाई के बात सुनके लतालू के आँखी ले आँसू के धार बोहाय लगिस। ओहा फुदालू के चरन म गिर परिस।
“ददा, मोला माफ कर दे। मँय घमंड अउ आलस म अंधरा हो गे रहेंव। अब मँय कभू मेहनत ले मुँह नइ मोड़वँव।”
फुदालू ह अपन छोटे भाई ल उठाइस अउ गले लगा लिस।
दूसर दिन ले लतालू ह अपन बड़े भाई संग खेत म जाय लगिस। शुरू-शुरू म काम करत ओकर हाथ-पाँव दुखाय, फेर धीरे-धीरे मेहनत ओखर आदत बन गे। अब ओहा बिहनिया जल्दी उठय, खेत म काम करय अउ अपन पसीना के कमाई खाय लगिस।
कुछ दिन बाद ओखर चेहरा म आत्मविश्वास के चमक लहुट आइस। अब ओहा दूसर के दुवारी म भीख माँगे वाला लाचार मनखे नइ रहिगे, बल्कि अपन मेहनत के भरोसा म जिनगी जिये वाला स्वाभिमानी मनखे बन गे।
दूनों भाई मिलके खेती-बारी करिन। खेत म फसल लहलहाइस। घर म अन्न के कमी दूर होइस। दूनों भाई म फेर ले मया अउ अपनापन के डोर मजबूत होगे।
गाँव के मनखे मन घलो ए बदलाव ल देखिन। सबो झन समझ गें कि मनखे के जिनगी म मेहनत के का महत्त्व हे।
सही बात तो ये आय कि जमीन बंजर हो सकथे, किस्मत कमजोर हो सकथे, परिस्थिति कठिन हो सकथे; फेर जेन मनखे के जाँगर जिंदा हे, ओकर आशा कभू बंजर नइ होवय।
कहानी के सीख
“मेहनत के पसीना जब धरती म गिरथे, तब सुख-समृद्धि के फसल लहलहाथे। आलस मनखे ल गरीबी के रद्दा म ले जाथे, अउ जाँगर ओला सम्मान के जिनगी जीना सिखाथे।”
— हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा (छत्तीसगढ़)
