मोर नींद ले ककरो भला होगे
एक सच्चा संस्मरण
लेखक: हेमलाल साहू
ग्राम गिधवा, पोस्ट नगधा
जिनगी मँ कुछ घटना अइसन होथें, जेन मनखे के मन मँ हमेशा बर बस जाथें। कुछ घटना हँसाथें, कुछ सिखाथें, अउ कुछ घटना मन मँ दूसर मनखे बर दया, मया अउ सेवा के भावना जगा देथें। मोर जिनगी मँ घटे एक अइसने घटना आज घलो मोर मन मँ ताजा हे।
जब मँय पहली बार कोऑपरेटिव सोसाइटी मँ काम करत रहेंव, त हर तीन महीना मँ ऑपरेशन ट्रेनिंग बर अहमदाबाद जाना पड़य। ट्रेनिंग के दौरान मोर संग कईठन घटना घटिस, फेर एक घटना अइसन हे, जेला मँय आज घलो भुलाय नइ सके हँव।
ट्रेनिंग पूरा होय के बाद अहमदाबाद रेलवे स्टेशन ले चाम्पा रेलवे स्टेशन तक के वापसी टिकिट मोर करा रहिस। ट्रेन ले ये सफर पूरा करे मँ लगभग छब्बीस-सत्ताइस घंटा लगत रहिस। रात के बारह बजे ट्रेन मँ चढ़े के बाद दूसरइया रात के करीब दू-तीन बजे चाम्पा उतरना रहय।
रात के बारह बजे ट्रेन आइस अउ मँय ओमा चढ़ गेंव। अपन आरक्षित सीट मँ जाके बइठेंव अउ सफर के थकान के मारे सुत गेंव। आरक्षित सीट के अपन अलग सुविधा रहिथे। भीड़-भाड़ ले दूर, अपन सीट मँ आराम से बइठे अउ सुते के सुविधा मिल जथे।
सफर के थकान अइसन रहिस कि कब दूसरइया दिन हो गे, पता नइ चलिस। दिन भर आराम करत-करत फेर रात हो गे। अब मोला चाम्पा उतरना रहय, एखर सेती बीच-बीच मँ नींद खुलत रहय।
दुर्ग स्टेशन आइस, त मँय झकनाके उठेंव। खिड़की ले बाहिर देखेंव अउ दुर्ग स्टेशन आय हे जानके फेर सुत गेंव। थोरिक देर बाद फेर नींद खुलिस। खिड़की ले झाँक के देखेंव, त बिलासपुर स्टेशन मँ गाड़ी खड़े रहय। मँय सोचेंव, ‘अभी तो समय हे, थोरिक देर अउ आराम कर लेथँव।’ अउ फेर नींद के आगोश मँ समा गेंव।
लेकिन, कभू-कभू मनखे के एकठन छोटी-सी लापरवाही घलो ओकर बर बड़ी परेशानी खड़ा कर देथे।
अचानक मोर नींद खुलिस। मँय हड़बड़ाके उठेंव अउ खिड़की ले बाहिर देखे के कोसिस करेंव। रात के अँधियारी मँ कुछ साफ नइ दिखत रहय। मँय तुरते मोबाइल निकालेंव अउ अपन लोकेशन चेक करेंव।
लोकेशन देखत भर मोर होश उड़ गे!
रायगढ़ आवे वाला रहय!
मोर हाथ-पाँव फूल गे। चाम्पा तो कब के छूट गे होही! अब का करँव? ए सोचत-सोचत मोर सबो नींद उड़ गे। मँय हड़बड़ावत अपन समान मन ला समेटेंव अउ ट्रेन के दरवाजा तीर जाके खड़े हो गेंव।
थोरिकेच देर मँ रायगढ़ स्टेशन आइस अउ मँय तुरते उतर गेंव।
अभी चैन के साँस घलो नइ ले पाय रहेंव कि टीटीआई बाबू आके टिकिट देखाय बर कहिस। मँय टिकिट दिखाएँव, त वो कहिस, “टिकिट तो चाम्पा तक के हे। अब रायगढ़ उतर गे हस, त चालान भरना पड़ही।”
मँय अपन गलती बतावत कहेंव, “साहब, का बतावँव! सफर के थकान मँ मोर नींद लग गे रहिस। चाम्पा कब आइस, पता नइ चलिस। जब नींद खुलिस, त रायगढ़ आ गे रहेंव।”
टीटीआई बाबू कहिस, “चल, वापसी के टिकिट ले लेबे, त छोड़ देहूँ।”
मँय तुरते वापसी के टिकिट लेंव। तब जाके मोला राहत मिलिस।
रात के करीब चार बजत रहिस। अपन समान मन ला धरके प्लेटफॉर्म नंबर दू मँ आके बइठ गेंव। रात के सन्नाटा, ठंडी हवा अउ लमहर सफर के थकान—सब मिलके मोला फेर आराम करे बर मजबूर कर दिस। मँय प्लेटफॉर्म मँ लेट गेंव अउ आँख मूँदके आराम करे लगेंव।
तभे एकठन अजीब घटना घटिस।
एकठन सुघ्घर, गोरी टूरी आके मोर करा बइठ गे।
एतका रात मँ प्लेटफॉर्म लगभग सुनसान रहय। ओला अचानक अपन करा बइठे देखके मँय चौंक गेंव। मोर मन मँ तरह-तरह के विचार आवे लगिन। मँय सोचेंव, ‘एतका रात मँ ये टूरी इहाँ कइसे आ गे? कहीं कोनो मुसीबत मँ तो नइ फँस जावँव? कहीं कोनो अनहोनी तो नइ होय वाला?’
डर अउ शंका के मारे मँय उठेंव अउ मुँह धोये बर चल देंव।
मुँह धोके जब वापस आके बइठेंव, त देखेंव कि वो टूरी रोवत रहय। ओकर आँख मँ आँसू रहिन अउ चेहरा मँ डर साफ झलकत रहय।
मोला देखके वो धीरे-धीरे कहे लगिस—
“भैया, मँय ओ मेर बइठे रहेंव। तभे तीन झन टूरा मन आके मोला परेशान करे लगिन। मोला इहाँ ले चले बर कहत रहिन। मँय बहुत डर गे रहेंव। आप मोला भला मनखे लगेव, एखरे सेती आप मन के करा आके बइठ गेंव।”
ओकर बात सुनके मोर मन पसीज गे। जेन टूरी ला मँय कुछ देर पहिली शंका के नजर ले देखत रहेंव, ओही टूरी के आँख मँ अब मोला अपन बहिनी के दुख दिखे लगिस।
मँय ओला ढाढ़स बँधावत कहेंव, “डर मत बहिनी, कुछ नइ होही। मँय हँव न।”
तभे वो तीनों टूरा मन फेर हमन डहर आवत दिखिन। मोला देखके वो मन आगू डहर भाग गिन।
अब मोर मन मँ एके सवाल रहिस—आखिर ये बहिनी एतका रात मँ इहाँ कइसे पहुँच गे?
मँय ओला पूछेंव, “बहिनी, तोर घर कहाँ हे? अउ तँय एतका रात मँ इहाँ कइसे आ गे?”
तब वो अपन आपबीती सुनाइस।
वो रायपुर मँ हॉस्टल मँ रहिके नर्सिंग कॉलेज मँ पढ़त रहय। छुट्टी होय के सेती अपन घर आवत रहय। गलती से लोकल ट्रेन के बदला सुपरफास्ट ट्रेन मँ बइठ गे रहय। वो ट्रेन शक्ति स्टेशन मँ नइ रुकिस, एखरे सेती वो रायगढ़ पहुँच गे रहय।
ओकर बाबूजी ओला लेगे बर शक्ति स्टेशन मँ आय रहिन होहीं। जब बेटी उहाँ नइ उतरिस, त घर के मन कतका परेशान होवत होहीं, ये सोचके वो अउ घलो रोये लगिस।
ओकर मोबाइल घलो बंद हो गे रहय। न घर मँ खबर दे सके, न कोनो परिचित ले संपर्क कर सके। अनजान शहर, आधा रात अउ ऊपर ले कुछ मनखे मन के परेशान करे के डर—ओकर हालत सचमुच दयनीय रहय।
मँय तुरते अपन मोबाइल ओला देके कहेंव, “ले बहिनी, अपन घर मँ फोन करके बता दे कि तँय सुरक्षित हस।”
वो मोर मोबाइल ले अपन घर मँ फोन करिस अउ अपन हाल-चाल बताइस। घर के मन ला ओकर सुरक्षित होय के खबर मिलिस, त ओकर चेहरा मँ राहत के मुस्कान लौट आइस।
ओ मुस्कान देखके मोर मन घलो जुड़ा गे। थोरिक देर पहिली जेन टूरी डर अउ चिंता मँ डूबी रहय, अब वो कुछ निश्चिंत दिखत रहय।
थोरिकेच देर बाद हमर ट्रेन घलो आ गे। हमन दूनों झन ट्रेन मँ चढ़ गेन। सफर के दौरान चायवाला आइस, त हमन चाय पियेन अउ थोरिक देर बातचीत करेन। अब वो टूरी के चेहरा मँ पहिली जइसन डर नइ रहय।
जब ट्रेन शक्ति स्टेशन मँ पहुँचिस, त वो उतरते बखत मोर डहर देखिस। ओकर आँख मँ आभार झलकत रहय। वो हाथ जोड़के कहिस—
“भैया, आज आप मोर बहुत मदद करे हव। मँय ए उपकार ला जिनगी भर नइ भुलाहूँ।”
ओकर बात सुनके मोर मन खुशी ले भर गे। मँय कुछ खास तो करे नइ रहेंव। बस एक परेशान बहिनी ला अपन मोबाइल देके घर मँ बात करे के मौका दे रहेंव अउ मुसीबत के बखत ओकर संग खड़े रहेंव। फेर ओकर बर ए छोटी-सी मदद घलो बड़े सहारा बन गे रहय।
ट्रेन आगू बढ़ गे, फेर वो घटना मोर मन मँ हमेशा बर छप गे।
मँय मन ही मन भगवान ला धन्यवाद देत सोचेंव—
“हे भगवान! मँय तो अपन नींद मँ चाम्पा स्टेशन छोड़के रायगढ़ उतर गे रहेंव, फेर मोर ए गलती के कारण एक जरूरतमंद बहिनी के मदद हो गे। सचमुच, मोर नींद ले ककरो भला हो गे!”
आज जब मँय ओ घटना ला याद करथँव, त मोला लगथे कि जिनगी के हर घटना खाली संयोग नइ होवय। कभू-कभू हमन जेन बात ला अपन गलती समझथन, ओही घटना हमर आगू ककरो मदद करे के अवसर बनके आ जथे।
ओ रात मोला एकठन अनमोल सीख मिलिस—मनखे के असली बड़प्पन ओकर पद, पैसा या प्रतिष्ठा मँ नइ, बल्कि दूसर मनखे के दुख ला समझे अउ जरूरत के बखत ओकर मदद करे मँ हे।
ककरो परेशानी मँ ओकर सहारा बनना, ककरो डर के बखत ओकर हिम्मत बनना अउ ककरो आँसू पोंछके ओकर चेहरा मँ मुस्कान लाना—एखर ले बड़े पुण्य के काम अउ का हो सकथे?
कभू-कभू भगवान हमर ले बड़े काम करवाय बर हमन ला अइसने अनजाने रद्दा मँ ले जथे, जिहाँ हमर एकठन छोटकुन मदद घलो दूसर मनखे बर बड़े सहारा बन जथे।
ओ रात मँ चाम्पा उतरना भुला गे रहेंव, फेर रायगढ़ मँ एक बहिनी के मदद करे के मौका मिलिस। एखरे सेती आज घलो मोर मन मँ एके भावना उठथे—
“जिनगी मँ सफल होना बड़े बात नइ ये, ककरो जरूरत के बखत काम आना बड़े बात हे।”
— हेमलाल साहू
ग्राम गिधवा, पोस्ट नगधा
